ဆီးချိုရောဂါရှိသူအများစုဟာ “ဆီးချိုတက်မှာ” (သကြားဓာတ်များမှာ) ကိုပဲ အဓိက စိုးရိမ်လေ့ရှိကြပါတယ်။ ဒါပေမဲ့ ဆရာဝန်တွေ အကြောက်ဆုံးကတော့ ဆီးချိုတက်တာထက် “ဆီးချိုကျတာ” (သကြားဓာတ် လိုအပ်တာထက် နည်းသွားတာ) ဖြစ်ပါတယ်။
ဘာကြောင့် ဒီလောက်ကြောက်ရတာလဲ?
ဆီးချိုတက်တာက လူကို ချက်ချင်း အန္တရာယ်မပေးပါဘူး။ ရေရှည်ကျမှသာ ကျောက်ကပ်ထိခိုက်တာ၊ မျက်လုံးကွယ်တာမျိုးတွေ ဖြစ်စေတာပါ။ ဒါပေမဲ့ ဆီးချိုကျတာကတော့ မိနစ်ပိုင်းအတွင်း အသက်အန္တရာယ် ပေးနိုင်ပါတယ်။ ဦးနှောက်က အလုပ်လုပ်ဖို့ သကြားဓာတ်မရတော့တဲ့အခါ ချက်ချင်း သတိလစ်တာ၊ တက်တာနဲ့ အသက်ဆုံးရှုံးတာမျိုးတွေအထိ ဖြစ်ပွားနိုင်လို့ပါ။
ဆီးချိုကျရင် ပြတတ်တဲ့ ရှေ့ပြေးလက္ခဏာများ
၁။ ရင်တုန်လာမယ်၊ ရင်ထဲ လှပ်ခနဲ လှပ်ခနဲ ဖြစ်မယ်။
၂။ လက်ဖျားခြေဖျားတွေ တုန်လာမယ်။
၃။ ချွေးစေးတွေ အလွန်အမင်း ထွက်လာမယ်။
၄။ ဗိုက်အရမ်းဆာလာမယ်။
၅။ ခေါင်းမူးမယ်၊ မျက်စိပြာမယ်။
၆။ စိတ်တိုလွယ်မယ်၊ ဂနာမငြိမ် ဖြစ်မယ်။
၇။ အဆိုးဆုံးအဆင့်မှာတော့ သတိလစ် မေ့မြောသွားပါလိမ့်မယ်။
ချက်ချင်း ဘာလုပ်ရမလဲ? (ရှေးဦးသူနာပြုစုနည်း)
လူနာက သတိရှိနေသေးရင် အမြန်ဆုံး သကြားဓာတ် ဖြည့်ပေးရပါမယ်။
သကြား ထမင်းစားဇွန်း (၁) ဇွန်း (သို့)
ပျားရည် (၁) ဇွန်း (သို့)
အချိုရည် တစ်ခွက် (သို့)
ချိုချဉ် (၃) လုံးခန့် ချက်ချင်း စားလိုက်ပါ။
(၁၅) မိနစ်ခန့်နေလို့ မသက်သာရင် နောက်ထပ် တစ်ကြိမ် ထပ်စားပါ။ သက်သာလာပြီဆိုမှ ပေါင်မုန့် သို့မဟုတ် ထမင်း စတဲ့ အစာမာတစ်ခုခုကို ထပ်မံ စားသုံးပေးပါ။
အထူးသတိပြုရန်
လူနာက သတိလစ်သွားပြီဆိုရင်တော့ ပါးစပ်ထဲ ဘာမှ အတင်းမထည့်ပါနဲ့။ အသက်ရှူလမ်းကြောင်းပိတ်ပြီး အသက်ဆုံးရှုံးနိုင်ပါတယ်။ နီးစပ်ရာ ဆေးရုံ၊ ဆေးခန်းကို အမြန်ဆုံး ပို့ဆောင်ပြီး သွေးကြောထဲ ဂလူးကို့စ်သွင်းကုသမှု ခံယူရပါမယ်။
ဆီးချိုမကျအောင် ဘယ်လိုနေထိုင်မလဲ?
ဆီးချိုဆေးသောက်ထားရင် (သို့) ဆေးထိုးထားရင် အစာမစားဘဲ မနေပါနဲ့။
ထမင်းစားချိန် မှန်ပါစေ။
လေ့ကျင့်ခန်း အပြင်းအထန် လုပ်မယ့်ရက်တွေမှာ အစာ ပိုစားထားပါ။
အပြင်သွားရင် သကြားလုံး ဒါမှမဟုတ် ချိုချဉ် အမြဲ ဆောင်ထားပါ။
#DiabetesTips #ကျန်းမာရေးဗဟုသုတ #ဆီးချိုကျခြင်း
#crd to original uploader
